ஜி-20 நாடுகள் மாநாட்டில் கலந்து கொள்வதற்காக லண்டன் செல்லும் பிரதமர் மன்மோகன் சிங், அமெரிக்க அதிபர் பராக் ஒபாமாவை வரும் ஏப்ரல் 2 ம் தேதி சந்தித்துப் பேச திட்டமிட்டுள்ளார். பிரிட்டன் பிரதமர் பிரவுனின் அழைப்பை ஏற்று ஜி-20 நாடுகளின் உச்சிமாநாட்டில் பிரதமர் மன்மோகன் சிங் கலந்து கொள்கிறார். சர்வதேச அளவில் அளவில் சரிந்து வரும் பொருளாதாரம், பயங்கரவாதம், அணுசக்தி ஒப்பந்தம் உள்ளிட்ட பல்வேறு பிரச்னைகள் குறித்து ஒபாமாவுடன் மன்மோகன் பேச்சுவார்த்தை நடத்த உள்ளதாக பிரதமர் அலுவலக வட்டாரங்கள் தெரிவித்தன. ஏப்ரல் மாதம முதல்தேதி டெல்லியிலிருந்து லண்டன் புறப்பட்டுச் செல்லும் பிரதமர், மீண்டும் 4 ம் தேதி டெல்லி திரும்புகிறார். பிரதமரின் இந்தப் பயணத்தின் போது, பிரதமரின் பணிகளை டெல்லியில் வெளியுறவு அமைச்சர் பிரணாப் முகர்ஜி கவனிப்பார் என்றும் அந்த வட்டாரங்கள் கூறின. அண்மையில் இதய அறுவை சிகிச்சை செய்து கொண்ட பிரதமர் லண்டன் செல்வதற்கு உடற்தகுதி பெற்றுவிட்டதாக டாக்டர்கள் தெரிவித்திருப்பதால், அவர் இந்த சுற்றுப்பயணம் மேற்கொள்வதாகவும் தெரிவிக்கப்பட்டுள்ளது. தவிர, அடுத்த மாதம் 2ம் தேதியன்று பிரதமர் மன்மோகன் சிங், லண்டனுக்கு இதே மாநாட்டில் பங்கேற்க வரும் அமெரிக்க அதிபர் பராக் ஒபாமாவைச் சந்திப்பதற்கான பணிகளில் இந்திய வெளியுறவுத் துறை ஈடுபட்டிருப்பதாகவும் தகவல்கள் தெரிவிக்கின்றன.